বিপদত পৰিছে মাৰ্ক জুকাৰবাৰ্গৰ কোম্পানী মেটা। মেটাক ৭৯৮ মিলিয়ন ইউৰো জৰিমনা বিহিছে ইউৰোপীয় সংঘই। ইয়াৰ মূল্য ভাৰতীয় মুদ্ৰাত ৭,১০০ কোটি টকাতকৈও অধিক।
ইউৰোপীয় ইউনিয়নৰ অভিযোগ অনুসৰি, মেটাই নিজৰ অনলাইন ক্লাছিফাইড বিজ্ঞাপন সেৱা ফেচবুক মাৰ্কেটপ্লেছক নিজৰ ব্যক্তিগত ছ’চিয়েল নেটৱৰ্ক ফেচবুকৰ সৈতে সংযোগ কৰিছে। মেটা প্লেটফৰ্মত মেটাই অন্যান্য অনলাইন ক্লাছিফাইড এড সেৱা প্ৰদানকাৰীৰ ওপৰত অন্যায় চৰ্ত আৰোপ কৰিছে। ই ‘এণ্টি-ট্ৰাষ্ট নিয়ম’ উলংঘা কৰিছে।
বৃহস্পতিবাৰে ইউৰোপীয় ইউনিয়নে এক বিবৃতি জাৰি কৰে। বিবৃতিটোত কোৱা হৈছে যে, “মেটাই অনলাইন ক্লাছিফাইড বিজ্ঞাপন সেৱা ফেচবুক মাৰ্কেটপ্লেছক ব্যক্তিগত ছ’চিয়েল মিডিয়া ফেচবুকৰ সৈতে সংযোগ কৰি অন্যান্য অনলাইন ক্লাছিফাইড বিজ্ঞাপন সেৱা প্ৰদানকাৰীৰ ওপৰত অন্যায় চৰ্ত আৰোপ কৰি ইউৰোপীয় সংঘৰ ‘এণ্টিট্ৰাষ্ট আইন’ উলংঘা কৰিছে।” এই কাৰণতে কোম্পানীটোক জৰিমনা বিহা হৈছে।
ইয়াৰ উপৰিও ইউৰোপীয় আয়োগৰ প্ৰতিযোগিতা নীতিৰ দায়িত্বত থকা কাৰ্যবাহী উপ-সভাপতি মাৰ্গ্ৰেথ ভেষ্টাগাৰে এই জৰিমনা সন্দৰ্ভত এক বিবৃতি প্ৰদান কৰে। সেই বিবৃতিত তেওঁ কয় যে ছ’চিয়েল মিডিয়াৰ আধিপত্যৰ সুবিধা লৈ ব্যক্তিগত ছ’চিয়েল মিডিয়া ব্যৱহাৰ কৰি প্ৰচাৰমূলক বিষয়বস্তুৰ বিজ্ঞাপন দিয়াৰ বাবে ইউৰোপীয় আয়োগে মেটাক এই জৰিমনা বিহিছে।
ইউৰোপীয় ইউনিয়নে লক্ষ্য কৰে যে ফেচবুক ব্যৱহাৰকাৰীসকলে এনে বজাৰৰ সৈতে জড়িত হয়। ফলত ব্যৱহাৰকাৰীয়ে ভাল পাওক বা নাপাওক, ফেচবুকৰ অনলাইন ক্লাছিফাইড এডছ সেৱা তেওঁলোকৰ ওচৰলৈ নিয়মীয়াকৈ আহিব। আৰু ইয়াৰ অতিৰিক্ত সুবিধা আছে ফেচবুকৰ। কিন্তু সুবিধাৰ ফলত আন বহুতো ক্লাছিফাইড এড সেৱা ক্ষতিগ্ৰস্ত হৈছে। যাৰ ফলত ৭,১০০ কোটি টকা জৰিমনা বিহা হৈছে মেটাক।
