আজি ১৬ মে’ অৰ্থাৎ টালি-টোপোলা বন্ধা দিৱস। ২০১৪ চনত লোকসভা নিৰ্বাচনৰ পূৰ্বে অসমলৈ আহিছিল নৰেন্দ্ৰ মোদী। অসমলৈ আহি নিৰ্বাচনী প্ৰচাৰত তেওঁ কৈছিল – “১৬ মে’ কে বাদ আসাম মে এক হি বাংলাদেশী নেহি ৰহেংগে। সব কোচ সামান লেকৰ যানা পৰেগা। য়ে লিখকৰ ৰখিয়ে।”
তাৰপিছত এনেকুৱা ১০ টা ১৬ মে’ পাৰ হৈ গ’ল। কিন্তু অসমৰ পৰা টালি-টোপোলা বান্ধি নগ’ল বাংলাদেশী। তাৰপৰিবৰ্তে বাংলাদেশীক আদৰিবলৈ নাগৰিকত্ব সংশোধনী আইন আনিলে বিজেপি চৰকাৰে। ইয়াৰ বাবে অসমৰ পাঁচটা ফু্ল কুমলীয়া ল’ৰাও হত্যা কৰা হ’ল। আনকি, ডিচেনচন কেম্পত বন্দী হৈ থকা বিদেশী নাগৰিকক বিতাৰণ কৰিবলৈ অসমৰ বিজেপি চৰকাৰক বাৰম্বাৰ নিৰ্দেশহে দিব লগা হ’ল দেশৰ উচ্চতম ন্যায়ালয়ে।
মোদীয়ে অসমৰ পৰা ১৬ মে’ৰ পিছত সকলো বাংলাদেশী যাবগৈ বুলি কোৱাত অসমৰ ৰাইজে ভাবিছিল যে অসমৰ এটা জলন্ত সমস্যা সমাধান হ’ব। বাংলাদেশী সমস্যা অসমৰ পৰা নোহোৱা কৰিব বিজেপি চৰকাৰে। আৰু সেই আশাতেই ২০১৪ চনৰ পৰা অসমৰ ৰাইজে বিজেপিক ভোট দিয়েই আছে। পিছে বাংলাদেশীহে এটাও নগ’ল। অৱশেষত ‘টালি-টোপোলা বন্ধা দিন’ হিচাপেই থাকি গ’ল এই দিনটো।
উল্লেখ্য যে অসমলৈ এতিয়াও বাংলাদেশী আহিয়েই আছে। এতিয়াও চৰকাৰী সা সুবিধা লাভ কৰি আছে বাংলাদেশী মূলৰ নাগৰিকে। কিন্তু মোদীৰ এই নিৰ্বাচনী প্ৰতিশ্ৰুতি কেৱল মাত্ৰ এটা ব্ৰহ্মফাঁকিয়েই হৈ থাকি গ’ল।
