আজি ২১ ফেব্ৰুৱাৰী, ২০২৫ ইং তাৰিখে ভাৰতৰ ছাত্ৰ ফেডাৰেচন,অসম ৰাজ্যিক কমিটিয়ে গুৱাহাটী প্ৰেছ ক্লাবত আন্তৰ্জাতিক মাতৃভাষা দিৱসৰ লগত সংগতি ৰাখি এখনি আলোচনা চক্ৰ অনুষ্ঠিত কৰে। অনুষ্ঠানটিত মুখ্য আলোচক হিচাপে উপস্থিত থাকে বিশিষ্ট কবি সমীৰ তাঁতী আৰু বিশিষ্ট সাহিত্যিক তথা শিক্ষাবিদ অনিল বড়ো।
অনুষ্ঠানটিৰ আঁত ধৰে বি বৰুৱা মহাবিদ্যালয়ৰ ছাত্ৰ ঋষিকেশ শৰ্মা আৰু ছাত্ৰী জিকমিক সমাদৃতা গগৈয়ে। এছ এফ আই – অসম ৰাজ্যিক কমিটিৰ সদস্য ৰাজদ্বীপ মহন্তই আলোচনা চক্ৰটিৰ উদ্দেশ্য ব্যাখ্যা কৰে । গোলকীয় পুঁজিবাদৰ লগতেই ৰাজহুৱা শৈক্ষিক ব্যৱস্থাটো ধ্বংস কৰা আৰু এক দেশ এক ভাষা আৰু এক ধৰ্মৰ নীতি গ্ৰহণ কৰা কেন্দ্ৰৰ আৰু ৰাজ্যৰ দুয়োখন বিজেপি নেতৃত্বাধীন চৰকাৰে মাতৃভাষা ৰ প্ৰতি সংকট কঢ়িয়াই আনিছে, সেই বিষয়ে তেওঁ বক্তব্য আগবঢ়ায়।
কবি সমীৰ তাঁতীয়ে তেখেতৰ বক্তৃতাত বজাৰ আৰু অৰ্থনীতিয়ে কিদৰে ভাষিক আগ্ৰাসন সৃষ্টি কৰে তাৰ বিষয়ে বিস্তাৰিত আলোচনা দাঙি ধৰে। চিন্তাবিদ অনিল বড়োৱে ৰাজনৈতিক ক্ষেত্ৰখনত শাসকগোষ্ঠীয়ে ভাষিক অস্ত্ৰ কিদৰে ব্যৱহাৰ কৰে সেইবিষয়ে বক্তৃতা দাঙি ধৰে ।
অনুষ্ঠানটিত প্ৰিয়ম্বদা দাস , গীতিকা বৰ্মন আৰু আলোক নৰহে গীত পৰিৱেশন কৰে ।
ৰেড বুক্ছ ডে’ৰ লগত সংগতি ৰাখি সধনা দেৱীয়ে সৈনিক শিল্পী বিষ্ণুপ্ৰসাদ ৰাভাৰ এটি টোকা পাঠ কৰে ।
উপস্থিত ৰাইজৰ মাজৰ বহুকেইগৰাকীয়ে বক্তব্য প্ৰদান কৰাৰ পাছত অনুষ্ঠানটি সফলভাৱে সামৰণি পৰে।
