প্ৰয়াগৰাজৰ মহাকুম্ভ মেলাত সংঘটিত হৈছে কৰুণ ঘটনা। যোৱা ২৯ জানুৱাৰী তাৰিখে মৌনি অমৱস্যা উপলক্ষে ‘শ্বাহী স্নান’ৰ বাবে ত্ৰিবেনী সংগম ঘাটত ভিৰ কৰিছিল কোটি কোটি লোকে। আৰু তাৰ ফলত পদপিষ্ট হৈ কমেও ৩০ জন লোকৰ মৃত্যু হয়। এশৰো অধিক লোক আহত হয়।
চৰকাৰী তথ্য অনুসৰি মৃত্যুৰ সংখ্যা ৩০ জন আৰু আহতসকলৰ সংখ্যা ১০০ৰো অধিক। কিন্তু স্থানীয় লোকে দাবী কৰে যে ইয়াৰ প্ৰকৃত সংখ্যা আচলতে তাৰ দুগুণ।
কিন্তু কুম্ভমেলাত এনে ঘটনাই এয়াই প্ৰথম নহয়। ১৯৫৪ চনৰ পৰা এনে মৰ্মান্তিক ঘটনা ঘটি আহিছে কুম্ভ মেলাত।
কুম্ভমেলাৰ ইতিহাসৰ আটাইতকৈ মৰ্মান্তিক ঘটনা সংঘটিত হয় ১৯৫৪ চনত। স্বাধীনতাৰ পিছত চৰকাৰে তেতিয়া প্ৰথম কুম্ভ মেলাৰ আয়োজন কৰিছিল। সেই বছৰৰ ৩ ফেব্ৰুৱাৰীত এলাহাবাদত মৌনি অমৱস্যা উদযাপনৰ বাবে এক বৃহৎ জনসমাগম হয়। বিভিন্ন সংবাদ মাধ্যমৰ বাতৰি অনুসৰি পদপিষ্ট আৰু নদীত উটি যোৱাৰ ফলত কমেও ৮০০ লোকৰ মৃত্যু হয়।
তাৰ পিছত ১৯৮৬ চনত হৰিদ্বাৰত কুম্ভ মেলা অনুষ্ঠিত হৈছিল। সেই বছৰ কুম্ভ মেলাত সংঘটিত হুলস্থুলীয়া পৰিৱেশত কমেও ২০০ জন লোকে প্ৰাণ হেৰুৱাইছিল। সেইদিনা উত্তৰ প্ৰদেশৰ তেতিয়াৰ মুখ্যমন্ত্ৰী বীৰ বাহাদুৰ সিং আৰু আন ৰাজ্যৰ আন কেইবাজনো মুখ্যমন্ত্ৰী আৰু সাংসদ কুম্ভ মেলালৈ গা ধুবলৈ আহিছিল। তেওঁলোকৰ সুৰক্ষাৰ বাবে সাধাৰণ মানুহক নদীৰ পাৰলৈ যাবলৈ বাধা দিয়া হৈছিল। আৰু তেতিয়াই ভিৰ নিয়ন্ত্ৰণৰ বাহিৰলৈ যোৱাৰ বাবে এনে পৰিস্থিতিৰ সৃষ্টি হৈছিল।
২০০৩ চনত নাছিকৰ কুম্ভ মেলাত সংঘটিত হয় ভয়াবহ ঘটনা । জানিব পৰা মতে, সেই বছৰ কুম্ভ মেলাত হোৱা ভয়াবহ ঘটনাত ৩৯ জন লোকৰ মৃত্যু হৈছিল। লগতে আহত হৈছিল শ শ লোক।
তাৰ পিছত ২০১০ চনত কুম্ভ মেলাত আন এক কাণ্ড সংঘটিত হয়। সেই বছৰ হৰিদ্বাৰত কুম্ভ মেলাৰ আয়োজন কৰা হৈছিল। ১৪ এপ্ৰিলত ‘শ্বাহী স্নান’ৰ সময়ত সন্ত আৰু সাধাৰণ তীৰ্থযাত্ৰীৰ মাজত সংঘৰ্ষৰ সৃষ্টি হয়। জানিব পৰা মতে, এই সংঘৰ্ষত ৭ জন লোকৰ মৃত্যু হয়।
ইয়াৰ ঠিক তিনি বছৰৰ পাছত ২০১৩ চনত প্ৰয়াগৰাজত এক এক ঘটনা সংঘটিত হয়। কুম্ভমেলালৈ অহা লোকৰ ভিতৰত এলাবাদ ৰে’ল ষ্টেশ্যনৰ ফুটব্ৰিজৰ ৰেলিং ভাঙি যায়। জানিব পৰা মতে, এই ঘটনাত ৪২ জন লোকে প্ৰাণ হেৰুৱায়। লগতে কমেও ৪৫ জন লোক আহত হয়।২০১৩ চনৰ পিছত এইবাৰ ২০২৫ চনত প্ৰয়াগৰাজত সংঘটিত হয় ভয়ংকৰ ঘটনা। ১৩ জানুৱাৰীৰ পৰা প্ৰয়াগৰাজত আৰম্ভ হৈছিল মহাকুম্ভ মেলা। বুধবাৰে পুৱা ত্ৰিবেনী সংগমত কোটি কোটি লোক সমবেত হৈ মৌনি অমৱস্যা উপলক্ষে স্নান কৰে। খবৰ অনুসৰি অত্যধিক ভিৰৰ বাবে বেৰিকেড ভাঙি যোৱাৰ ফলত হুলস্থুলীয়া পৰিস্থিতিৰ সৃষ্টি হয়। এই ঘটনাত পদপিষ্ট হৈ ৩০ জন লোকে প্ৰাণ হেৰুৱাই আৰু গুৰুতৰভাবে আহত হয় ১০০ৰো অধিক লোক।
