জন্মদিন পালন নকৰে জনপ্ৰিয় সাহিত্যিক ৰাস্কিন বণ্ডে। পেহেলগামত সংঘটিত সন্ত্ৰাসবাদী আক্ৰমণৰ প্ৰতিবাদত আৰু সহ নাগৰিকক হেৰুৱাৰ শোকত এইবাৰ সকলোৰে সৈতে জন্মদিন উদযাপন নকৰাৰ সিদ্ধান্ত লৈছে। উল্লেখ্য যে প্ৰতি বছৰে তেওঁ মুছুৰীৰ কেম্ব্ৰিজ বুক ষ্ট’ৰত অনুৰাগীৰ সৈতে জন্মদিন উদযাপন কৰে।
১৯ মে’ত ৰাস্কিন বণ্ডে ৯১ বছৰ সম্পূৰ্ণ কৰিব।কিন্তু সেই উদযাপন এই বছৰ নহ’ব। ৰাস্কিন বণ্ডে সংবাদ মাধ্যমক কয় যে, “মই প্ৰতি বছৰে কৰা দৰে কেম্ব্ৰিজ বুক ষ্ট’ৰত মোৰ জন্মদিন উদযাপন কৰাৰ পৰিকল্পনা কৰিছিলোঁ। কিন্তু এই বছৰ সকলোৰে সৈতে উদযাপন নকৰাৰ সিদ্ধান্ত লৈছো।”
লগতে তেওঁ কয় পেহেলগাম ট্ৰেজেডী এতিয়াও আমাৰ মনত সতেজ হৈ আছে, ই আছিল এক শীতল মস্তিষ্কৰ হত্যা আৰু তাৰ পিছত এক অপ্ৰীতিকৰ পৰিস্থিতিৰ মুখামুখি। আমি ভুক্তভোগীৰ পৰিয়ালৰ সৈতে দৃঢ়তাৰে থিয় দিব লাগিব, কিয়নো তেওঁলোক এই কাণ্ডত গভীৰভাৱে আঘাত পাইছে।”
অৱশ্যে তেওঁ পাঠকসকলক আশ্বস্ত কৰে যে জুন মাহত তেওঁ কিতাপৰ দোকানলৈ গৈ ব্যক্তিগতভাৱে সাক্ষাৎ কৰাৰ পৰিকল্পনা কৰিছে।
লেখকৰ নতুন গ্ৰন্থ ‘life’s magic moment তেওঁৰ জন্মদিনত মুক্তি পোৱাৰ কথা। এই গ্ৰন্থখনৰ সন্দৰ্ভত তেওঁ কয় যে গ্ৰন্থখনৰ বিষয় বস্তু তেওঁৰ জীৱনৰ অভিজ্ঞতাৰ পৰা লোৱা হৈছে।
ৰাস্কিন বণ্ড এজন বিখ্যাত ভাৰতীয় ইংৰাজী সাহিত্যিক। যি মূলতঃ শিশু আৰু কিশোৰ-কিশোৰীৰ বাবে উপযোগী গল্প, উপন্যাস, ৰচনা লিখাৰ বাবে পৰিচিত। ১৯৩৪ চনৰ ১৯ মে’ত ব্ৰিটিছ ইণ্ডিয়াত (বৰ্তমান হিমাচল প্ৰদেশৰ কচৌলী) জন্মগ্ৰহণ কৰিছিল বণ্ডে।
ৰাস্কিন বণ্ডে ১৭ বছৰ বয়সত তেওঁৰ প্ৰথম উপন্যাস “দ্য ৰুম অন দ্য ৰুফ” ৰচনা কৰে আৰু পিছলৈ জোনাথন কেপ বঁটা লাভ কৰে। এই উপন্যাসখনত তেওঁৰ জীৱনৰ অভিজ্ঞতাৰ স্মৃতি উল্লেখ আছে— বিশেষকৈ ডেৰাডুনত কটোৱা কৈশোৰ কালৰ।
দীৰ্ঘদিন ধৰি তেওঁ ডেৰাডুন আৰু মুছূৰীত বসবাস কৰি আহিছে। তেওঁৰ লেখাত হিমালয়ৰ স্বৰূপ, পাহাৰীয়া জীৱন, সৰু চহৰৰ মানুহ, সৰল জীৱনশৈলীৰ প্ৰতিফলন ঘটিছে। ভাৰত চৰকাৰে পদ্মশ্ৰী (১৯৯৯) আৰু পদ্মভূষণ (২০১৪) বঁটাও ৰাস্কিন বণ্ডক প্ৰদান কৰিছে।
