কেন্দ্ৰীয় মন্ত্ৰী কিৰেন ৰিজিজুৱে বুধবাৰে লোকসভাত ৱাকফ (সংশোধনী) বিল, ২০২৪ উত্থাপন কৰিছে। এই বিলৰ জৰিয়তে ৱাকফ সম্পত্তিৰ ব্যৱস্থাপনা আৰু নিয়ন্ত্ৰণৰ ক্ষেত্ৰত কেইবাটাও সংশোধনী আনিব বিচৰা হৈছে।
লোকসভাত কেন্দ্ৰীয় মন্ত্ৰী গৰাকীয়ে কয় যে এই বিলে দৰিদ্ৰ মুছলমান সম্প্ৰদায়ৰ উন্নতিৰ বাবে ৱাকফ সম্পত্তিৰ সঠিক ব্যৱহাৰ নিশ্চিত কৰিব আৰু প্ৰশাসনত স্বচ্ছতা আনিব। তেওঁৰ মতে, এই বিল কোনো ধৰ্মীয় সংস্থাৰ স্বাধীনতাত হস্তক্ষেপ নকৰে, বৰঞ্চ ইয়াৰ দ্বাৰা সাধাৰণ মানুহৰ অধিকাৰ সুৰক্ষিত হ’ব।বিলখনত কেইবাটাও গুৰুত্বপূৰ্ণ প্ৰস্তাৱ আছে। ইয়াৰ ভিতৰত ৱাকফ সম্পত্তিৰ পঞ্জীয়নৰ বাবে কেন্দ্ৰীয় ডাটাবেছৰ ব্যৱস্থা, অমুচলমান সদস্যক ৱাকফ ব’ৰ্ডত অন্তৰ্ভুক্ত কৰা, আৰু সম্পত্তিৰ মালিকীৰ বিবাদৰ ক্ষেত্ৰত চৰকাৰী বিষয়াৰ সিদ্ধান্তক চূড়ান্ত কৰাৰ দৰে বিষয়।
ৰিজিজুৱে দাবী কৰিছে যে এই সংশোধনীৰ জৰিয়তে ৱাকফ ব’ৰ্ডৰ দুৰ্নীতি আৰু অপব্যৱহাৰ ৰোধ কৰা হ’ব।কিন্তু বিৰোধী দলসমূহে, বিশেষকৈ কংগ্ৰেছ, তৃণমূল কংগ্ৰেছ, আৰু অন্যান্য ইণ্ডিয়া ব্লকৰ সদস্যই এই বিলৰ তীব্ৰ বিৰোধিতা কৰিছে। তেওঁলোকে এই বিলক “সংবিধান বিৰোধী” আৰু “মুছলমান সম্প্ৰদায়ৰ বিৰুদ্ধে” বুলি অভিযোগ কৰিছে। বিৰোধীৰ মতে, এই বিলৰ জৰিয়তে চৰকাৰে ৱাকফ সম্পত্তিৰ ওপৰত অত্যধিক নিয়ন্ত্ৰণ ল’ব বিচাৰিছে, যিটো ধৰ্মীয় স্বাধীনতা আৰু সংখ্যালঘুৰ অধিকাৰৰ ওপৰত আক্ৰমণ।
কংগ্ৰেছৰ সাংসদ কে চি ভেনুগোপালে কয় যে অমুচলমানক ৱাকফ ব’ৰ্ডত স্থান দিয়াৰ প্ৰস্তাৱে মুছলমান সম্প্ৰদায়ৰ ধৰ্মীয় পৰিচালনাৰ অধিকাৰত হস্তক্ষেপ কৰিব। তেওঁ লগতে অভিযোগ কৰে যে এই বিল মহাৰাষ্ট্ৰ আৰু হাৰিয়ানাৰ নিৰ্বাচনৰ বাবে ৰাজনৈতিক উদ্দেশ্যৰে অনা হৈছে।
আনহাতে, ডিএমকে নেতা কানিমোঝিয়ে কয় যে এই বিলে সংবিধানৰ ৩০ নং অনুচ্ছেদ , যিয়ে সংখ্যালঘুৰ প্ৰতিষ্ঠান পৰিচালনাৰ অধিকাৰ দিয়ে , সেই নীতি উলংঘন কৰিব।বিৰোধীয়ে লগতে কয় যে ৱাকফ সম্পত্তিৰ বিবাদত চৰকাৰী বিষয়াৰ হস্তক্ষেপে স্থানীয় প্ৰশাসনৰ স্বায়ত্তশাসনত আঘাত হানে আৰু ই চৰকাৰৰ পক্ষত সিদ্ধান্ত লোৱাৰ সম্ভাৱনা বৃদ্ধি কৰিব। তেওঁলোকে এই বিধেয়ক খন “বিভাজনকাৰী” বুলি অভিহিত কৰি ইয়াক প্ৰত্যাহাৰ বা সংসদীয় সমিতিলৈ পঠিয়াবলৈ দাবী জনাইছে।
