এয়া ঘৰিয়ালৰ চকুপানী : কৰ্ণেল কুৰেশ্বীক লৈ কটু মন্তব্য কৰা বিজেপি মন্ত্ৰী বিজয় শ্বাহৰ ক্ষমা গ্ৰহণ নকৰিলে উচ্চতম ন্যায়ালয়ে

মধ্য প্ৰদেশৰ মন্ত্ৰী বিজয় শ্বাহে ভাৰতীয় সেনাৰ কৰ্ণেল ছফিয়া কুৰেশ্বীক লৈ আপত্তিজনক মন্তব্য কৰিছিল। ইয়াৰ বাবে উচ্চতম ন্যায়ালয়ত তেওঁ তীব্ৰ সমালোচনাৰ সমুখীন হয়। ইয়াৰ পিছত তেওঁ উচ্চতম ন্যায়ালয়ত ক্ষমা খোজে। কিন্তু উচ্চতম ন্যায়ালয়ে তেওঁৰ দয়া আবেদন নাকচ কৰে। উচ্চতম ন্যায়ালয়ে মন্তব্য কৰে যে আইনী প্ৰক্ৰিয়াৰ পৰা নিজকে ৰক্ষা কৰিবলৈ মানুহে প্ৰায়ে ঘৰিয়ালৰ চকুলো টুকে। ন্যায়াধীশ সূৰ্য কান্তই কয় যে বিজয় শ্বাহে আন্তৰিকতাৰে ক্ষমা বিচৰা নাই।

ইয়াৰ উপৰিও আদালতে শ্বাহৰ বিৰুদ্ধে তদন্তৰ বাবে তিনিজনীয়া বিশেষ তদন্তকাৰী দল (SIT) গঠনৰ নিৰ্দেশ দিছে। ২৮ মে’ৰ ভিতৰত প্ৰতিবেদন দাখিল কৰিবলৈ নিৰ্দেশ দিয়া হৈছে তদন্তকাৰী দলটোক।

আজি উচ্চতম ন্যায়ালয়ৰ ন্যায়াধীশ সূৰ্য কান্তে পুনৰ এনে আপত্তিজনক মন্তব্যৰ বাবে মন্ত্ৰীগৰাকীক ধমক দি কয়, “এইটো কি ক্ষমাপ্ৰাৰ্থনা? আপুনি কেনেধৰণৰ ক্ষমাপ্ৰাৰ্থনা কৰিছে? ক্ষমাপ্ৰাৰ্থনাৰ এটা অৰ্থ আছে। কেতিয়াবা মানুহে কেৱল ন্যায়িক প্ৰক্ৰিয়াৰ পৰা মুক্তি পাবলৈ এনে ভদ্ৰ ভাষা ব্যৱহাৰ কৰে। আপুনি এনেকুৱা ধাৰণা সৃষ্টি কৰিব বিচাৰে যে আদালতে আপোনাক অনুৰোধ কৰিছে। আপুনি কৰা আপত্তিজনক মন্তব্যৰ বাবে আন্তৰিকতাৰে ক্ষমা খুজিবলৈ পৰা নাই কিয়?”

ইয়াৰ উপৰিও শুনানিৰ সময়ত ন্যায়াধীশগৰাকীয়ে জানিব বিচাৰিছে যে এই গোচৰৰ পৰিপ্ৰেক্ষিতত মধ্যপ্ৰদেশ চৰকাৰে এতিয়ালৈকে কি ব্যৱস্থা গ্ৰহণ কৰিছে। তদন্তৰ পদ্ধতিৰ বিষয়েও তেওঁ আৰক্ষীক প্ৰশ্ন কৰে।

উল্লেখ্য যে সোমবাৰে ইন্দোৰৰ সমীপৰ মহৌটে তহচিলৰ মনপুৰত চৰকাৰী অনুষ্ঠানত ভাষণ দি বিজয় শ্বাহে কয়, “তেওঁলোকে আমাৰ হিন্দু ভাইসকলক কাপোৰ খুলি ধৰ্মীয় পৰিচয় পৰীক্ষা কৰি খুলি হত্যা কৰিছে। প্ৰধানমন্ত্ৰী মোডীজীয়ে তেওঁলোকৰ ভগ্নীক তেওঁলোকৰ ঘৰত আক্ৰমণ কৰিবলৈ পঠিয়াইছে। তেওঁলোকে আমাৰ ভগ্নীসকলক বিধৱা কৰিছে। গতিকে মোদীজীয়ে তেওঁলোকৰ সম্প্ৰদায়ৰ ভগ্নীক তেওঁলোকৰ বিৰুদ্ধেই আক্ৰমণ কৰিবলৈ পঠাইছে।”মন কৰিবলগীয়া যে মধ্যপ্ৰদেশ উচ্চ ন্যায়ালয়ে ভাৰতীয় সেনাৰ কৰ্ণেল ছফিয়া কুৰেশ্বীৰ বিৰুদ্ধে “অশ্লীল” মন্তব্য আৰু “লেতেৰা ভাষা” ব্যৱহাৰ কৰাৰ অভিযোগত বিজয় শ্বাহৰ বিৰুদ্ধে এফআইআৰ দাখিল কৰাৰ নিৰ্দেশ দিছিল। সেই নিৰ্দেশক প্ৰত্যাহ্বান জনাই বিজয় শ্বাহে উচ্চতম ন্যায়ালয়ৰ কাষ চাপিছিল আৰু জৰুৰী শুনানি বিচাৰিছিল। বৃহস্পতিবাৰে উচ্চতম ন্যায়ালয়ে এই আবেদন নাকচ কৰে। ইয়াৰ উপৰিও বিজয়ে শ্বাহক কৰ্ণেল ছফিয়া কুৰেশ্বীৰ ওচৰত ক্ষমা খুজিবলৈ নিৰ্দেশ দিয়ে।