বিজেপি সাংসদক কুকুৰ আখ্যা দিলে মহুৱা মৈত্ৰই । নাম নোলোৱাকৈয়ে বিজেপি সাংসদ নিশিকান্ত ডুবেক ‘কুকুৰ’ আখ্যা দি আক্ৰমণ কৰিলে মহুৱা মৈত্ৰই। দেওবাৰে মহুৱাই নিজৰ এক্স হেণ্ডেলত লিখিলে এইদৰে – এটা পিটবুলে মালিকৰ আদেশ অবিহনে একো নকৰে।
উল্লেখ্য যে উচ্চতম ন্যায়ালয় আৰু মুখ্য ন্যায়াধীশক লৈ বিজেপই সাংসদ নিশিকান্ত ডুবেয়ে কৰা বিতৰ্কিত মন্তব্যৰ পিছতেই এই দৰে নিশিকান্তক সামাজিক মাধ্যমত তুলাধূনা দিলে তৃণমূলৰ সাংসদ মহুৱা মৈত্ৰই।
শনিবাৰে বিজেপিৰ সাংসদ নিশিকান্ত ডুবেই ৱাকফ আইনক সমৰ্থন কৰিবলৈ গৈ উচ্চতম ন্যায়ালয়ক আক্ৰমণ কৰে। উচ্চতম ন্যায়ালয়ক লক্ষ্য কৰি বিজেপি সাংসদ নিশিকান্ত ডুবেই কয় যে যদি আইন প্ৰণয়ন কৰাটো উচ্চতম ন্যায়ালয়ৰ কাম হয় তেন্তে সংসদ বন্ধ কৰি দিয়ক।
নিশিকান্ত ডুবেই কয় যে যদি এই দেশত গৃহযুদ্ধ আৰম্ভ হয়, তেন্তে ইয়াৰ বাবে মুখ্য ন্যায়াধীশ সঞ্জীৱ খান্না দায়ী হ’ব।
ডুবেৰ এই বক্তব্য ৰাজহুৱা হোৱাৰ পিছত সমগ্ৰ দেশতে বিতৰ্কৰ সৃষ্টি হয়। নিশিকান্তৰ বিৰুদ্ধে আইনী ব্যৱস্থা গ্ৰহণৰ বাবে উচ্চতম ন্যায়ালয়ত আবেদনো দাখিল কৰে বিৰোধী শিবিৰ।
এনে বিতৰ্কৰ মাজতে সাংসদ মহুৱা মৈত্ৰই দেওবাৰে এক্স হেণ্ডেলত কাৰো নাম নোলোৱাকৈ এটা বাৰ্তা পোষ্ট কৰে। তেওঁ লিখিছে, “মনত ৰাখিব, মালিকৰ আজ্ঞা অবিহনে পিট বুলে একো নকৰে। বিজেপিয়ে ন্যায়পালিকাৰ ওপৰত চলোৱা আক্ৰমণ সমগ্ৰ দেশে চাই আছে। এয়া উচ্চতম ন্যায়ালয়ৰ বিচাৰপীঠক অপমান কৰাৰ নিৰ্লজ্জ প্ৰচেষ্টা। এজন মূৰ্খ অত্যাচাৰী শাসকৰ শাসনত দেশৰ বাবে এইটোৱেই আটাইতকৈ বেয়া সময়।”
মন কৰিবলগীয়া যে নিশিকান্তৰ মহুৱাৰ সৈতে সংঘাত বহুদিন ধৰি চলি আহিছে। ইয়াৰ পূৰ্বে নিশিকান্তই মহুৱাক সাংসদৰ পৰ্টেলৰ লগইন আইডি আৰু পাছৱৰ্ড শ্বেয়াৰ কৰাৰ অভিযোগ উত্থাপন কৰিছিল। যিটো বিষয় আদালতলৈও গৈছিল। সেই ঘটনাৰ বাবেই ২০২৩ চনত মহুৱা মৈত্ৰই সাংসদ পদো হেৰুৱাবলগীয়া হৈছিল। পিছলৈ ২০২৪ চনৰ লোকসভা নিৰ্বাচনত কৃষ্ণনগৰ সমষ্টিৰ পৰা জয়ী হৈ মহুৱা পুনৰ সাংসদ হৈছিল।
সি যি কি নহওক, সাংসদ নিশিকান্ত ডুবেই দেশৰ ন্যায়পালিকাৰ ওপৰত চলোৱা এই আক্ৰমণে বিজেপিৰ ফেচিষ্ট চৰিত্ৰটোকেই পুনৰবাৰ উদঙাই দিলে। বিজেপিৰ শাসন কালত দেশৰ ন্যায়পালিকা আৰু সংবিধানৰ ওপৰত যেন উপৰ্যুপৰি আক্ৰমণ কৰা হৈছে তথা বিজেপি নেতা সকলে যে আইন-কানুন একো মানিব নোখোজে এই ঘটনা তাৰেই উৎকৃষ্ট উদাহৰণ।
