পাঁচ বছৰৰ বিৰতিৰ মূৰত প্ৰথমবাৰৰ বাবে বিগত ৪ অক্টোবৰ মঙলবাৰে জাপানৰ ভূখণ্ডৰ ওপৰেৰে ক্ষেপণাস্ত্র নিক্ষেপ কৰে কিম জং উনৰ দেশ উত্তৰ কোৰিয়াই । উত্তৰ কোৰিয়াক সতর্ক কৰিবলৈ বুধবাৰে ওলোটাই ক্ষেপণাস্ত্র নিক্ষেপ কৰে দক্ষিণ কোৰিয়া আৰু আমেৰিকাই । সূত্রই জনোৱা অনুসৰি, দুটাকৈ ‘আর্মী টেক্টিকেল মিছাইল ছিষ্টেম’ ক্ষেপণাস্ত্র নিক্ষেপ কৰে দক্ষিণ কোৰিয়া আৰু আমেৰিকাই । শক্তি প্রদর্শন কৰিবলৈয়েই দেশ দুখনে এই ক্ষেপণাস্ত্র নিক্ষেপ কৰা বুলি জানিবলৈ দিছে দক্ষিণ কোৰিয়াৰ সেনাই । পুনৰ দুটাকৈ ক্ষেপণাস্ত্র নিক্ষেপ কৰাৰ পাছতেই অঞ্চলটোত উত্তেজনা অধিক বৃদ্ধি হোৱা বুলি আন্তৰ্জাতিক সূত্ৰে জানিবলৈ পোৱা গৈছে । উত্তৰ কোৰিয়াৰ নেতা কিম জং উনে আন্তৰ্জাতিক নিষেধাজ্ঞা অমান্য কৰি দেশখনৰ পাৰমাণৱিক অস্ত্ৰাগাৰ বৃদ্ধি কৰাৰ লক্ষ্যৰে অস্ত্ৰ পৰীক্ষা অব্যাহত ৰাখিবলৈ সংকল্পৱদ্ধ বুলি শেহতীয়া মিছাইল উৎক্ষেপণে প্ৰমাণ কৰিছে ৷ একাংশ বিশেষজ্ঞই জনোৱা অনুসৰি কিমৰ লক্ষ্য হৈছে এক বৈধ পাৰমাণৱিক ৰাষ্ট্ৰ হিচাপে আমেৰিকা যুক্তৰাষ্ট্ৰৰ দ্বাৰা স্বীকৃতি লাভ কৰা আৰু জাৰি কৰা নিষেধাজ্ঞাসমূহ উঠাই লোৱা । অৱশ্যে আন্তৰ্জাতিক সম্প্ৰদায়ে সেইটো হ’বলৈ দিয়াৰ কোনো লক্ষণ দেখিবলৈ পোৱা হোৱা নাই ।
উল্লেখ্য যে, ৪ অক্টোবৰ মঙলবাৰে নিক্ষেপন কৰা ক্ষেপণাস্ত্ৰ গৈ পৰে প্রশান্ত মহাসাগৰত । অৱশ্যে ইয়াৰ ফলত কোনো লোক হতাহত হোৱা নাই । উত্তৰ কোৰিয়াৰ শেহতীয়া আক্ৰমণক কেন্দ্ৰ কৰি আন্তর্জাতিক মহলত তীব্ৰ প্ৰতিক্ৰিয়াৰ সৃষ্টি হৈছে । উক্ত ঘটনাক গৰিহণা দিছে জাপানৰ প্রধানমন্ত্রী ফুমিয়ো কিশিচাই । উত্তৰ কোৰিয়াৰ এনে ধৰণৰ আচৰণক ‘আক্রমণাত্মক’ আখ্যা দিছে কিশিচাই
