বিশ্বৰ দুই অৰ্থনৈতিক মহা শক্তি চীন আৰু আমেৰিকাৰ মাজত আৰম্ভ হৈছে বাণিজ্য যুদ্ধ। আমেৰিকাই চীনৰ ওপৰত আৰোপ কৰা শুল্ক ১০% ৰ পৰা ১২৫ শতাংশলৈ বৃদ্ধি কৰিছে। ইয়াৰ প্ৰতিবাদত চীনেও আমেৰিকাৰ ওপৰত ৮৪% শুল্ক আৰোপ কৰিছে।
চীনৰ চৰকাৰে স্পষ্ট কৰি দিছে যে বৃহস্পতিবাৰৰ পৰা আমেৰিকাৰ সামগ্ৰীৰ ওপৰত ৮৪ শতাংশ পৰ্যন্ত শুল্ক আৰোপ কৰা হ’ব।
অৱশ্যে এই দুয়োখন দেশৰ মাজত চলি থকা বাণিজ্য যুদ্ধৰ পৰা ভাৰতীয় গ্ৰাহকসকল প্ৰকৃততে লাভৱান হ’ব বুলি সূত্ৰই জানিবলৈ দিছে।
একাধিক ভাৰতীয় সংবাদ সংস্থাৰ মতে, চীনৰ ওপৰত আমেৰিকাই ব্যাপক শুল্ক আৰোপ কৰাৰ লগে লগে চীনৰ কেইবাটাও ইলেক্ট্ৰনিক উপাদান নিৰ্মাতাই ভাৰতীয় কোম্পানীক পাঁচ শতাংশ পৰ্যন্ত ৰেহাই আগবঢ়াইছে।
এই পৰিস্থিতিত ভাৰতীয় কোম্পানীসমূহেও গ্ৰাহকক তেওঁলোকৰ গ্ৰহণযোগ্যতা বৃদ্ধি কৰিবলৈ ৰেহাইৰ এক নিৰ্দিষ্ট অংশ প্ৰদান কৰিব বুলি আশা কৰা হৈছে। বিভিন্ন অৰ্থনৈতিক সংস্থাৰ বিষয়াসকলেও একেধৰণৰ আশা প্ৰকাশ কৰিছে। অদূৰ ভৱিষ্যতে অধিক চাহিদা থকা ফোন, টিভি, ফ্ৰীজৰ দৰে অত্যাৱশ্যকীয় সামগ্ৰীৰ দাম হ্ৰাস পাব পাৰে বুলি ধাৰণা কৰা হৈছে।
পাৰস্পৰিক শুল্ক নীতি কাৰ্যকৰী হোৱাৰ মাত্ৰ ২৪ ঘণ্টাৰ পিছত বুধবাৰে আমেৰিকাৰ ৰাষ্ট্ৰপতি ট্ৰাম্পে এক বৃহৎ সিদ্ধান্ত ঘোষণা কৰি কয় যে চীনৰ বাহিৰে সকলো দেশৰ বাবে ৯০ দিনৰ বাবে প্ৰতিশোধমূলক শুল্ক স্থগিত ৰখা হৈছে। একে সময়তে চীনৰ সামগ্ৰীৰ ওপৰত ১২৫ শতাংশ শুল্ক কাৰ্যকৰী কৰা হ’ব বুলি ঘোষণা কৰা হৈছে। ৱাশ্বিংটনৰ এই ঘোষণাৰ পিছতে চীনৰ ঔদ্যোগিক খণ্ডত বিৰাট অস্থিৰতাৰ সৃষ্টি হৈছে।
