অৱশেষত জন্তুটো জোলোঙাৰ পৰা ওলাল
কিন্তু মেকুৰী নহয়
‘জন্তুটোৰ নাম কি’? কবিয়ে সুধিছিল
উত্তৰটো সকলোৱে জানিও নাজানে
পিছে জন্তুটো নিজেই জোলোঙাৰ পৰা ওলাই আহিল কোনেও নভবাকৈয়ে
‘কুকুৰ’ হেনো তাৰ নাম
এনে প্ৰজাতিৰ কুকুৰ আমি দেখা নাছিলো
কোনোবাই কলে, এইটো জাৰ্মান চেফাৰ্ড।
হবও পাৰে, হিটলাৰৰ আছিল তেনে এজাক কুকুৰ,
ইহুদী দেখিলে জঁপিয়াই পৰে
কোনোবাই ক’লে, পগলা কুকুৰ
কাক কেতিয়া কামোৰে একো ঠিক নাই
উচিষ্ট বিচাৰি ঘূৰি ফুৰে
অনুচিত গাঁও অনুচিত চহৰ
বিচাৰি ফুৰে ডাষ্টবিন
খাদ্য দেখিলে সি ৰব নোৱাৰে
‘যিমানেই খাই তাৰ পেট নভৰে’
চকুৰ পলকতে সি
হাতীও খাই শেষ কৰিব পাৰে…
কোনোবাই ক’লে, ই ঢেঁকুৰা কুকুৰ
‘জঙ্গী’ নেতাৰ বাটৰ সংগী
আই-বাইৰ বুকুৰ কুটুম
উলাহতে ভৰি চেলেকে নেজ জোকাৰি
ৰঙা ৰঙৰ প্ৰতি পিছে তাৰ অদ্ভূত এলাৰ্জী
তাৰ ধৰ্ম কি নাজানো
ৰাতি ৰাতি সি
মৌলানাৰ ঘৰৰ চোতালত
এৰেহা মঙহৰ হাড় চোবায়
বাটৰ কুকুৰৰ দৃশ্য ল’লে
মিডিয়াৰ প্ৰথম টাৰ্গেট্ এই কুকুৰটো
কি যে বিনয়ী, শান্ত আৰু প্ৰভুভক্ত
ভুক্তভোগীয়ে জানে,শান্ত হৈ থাকিলে
আচলতে সি কিমান হিংস্ৰ
ইয়াৰ কামোৰতে মৃত্যু হৈছিল
এগৰাকী গান্ধীবাদী
সিদিনাও শান্ত হৈ আছিল সি….
দিন মাহ বছৰ পাৰ হৈ যায়
লেই লেই চেই চেই মাৰ কিল খাই
সি প্ৰকাণ্ড এটা হল
তাৰ বিচৰণ ভূমি
চৰণীয়া পথাৰ, চাহবাগান,উদ্যোগ, কাৰখানা, গভীৰ অৰণ্যানি
পঞ্চতাৰকা গৃহতো সি অনায়াসে প্ৰবেশ কৰে, নাই তাৰ লেখমানো ভয়
দুৰ্বল মানুহবোৰ লগে ভাগে থকাই ভাল
কাৰণ এতিয়া সি এটা গেঙৰ ৰজা
কেৱল হাতীয়েই নহয়,
গিলিব পাৰে সাতামপুৰুষীয়া সম্প্ৰীতি আৰু সভ্যতা
