ত্ৰিপুৰাত পুনৰ চৰকাৰ গঠন কৰিয়ে বিৰোধীক আক্ৰমণ কৰিবলৈ এক প্ৰকাৰে অনুঞ্জাপত্ৰ হে লাভ কৰিলে বিজেপি দলে। ২ মাৰ্চত ফলাফল ঘোষণা হোৱাৰ পাছতে বিৰোধী দল বিশেষকৈ চিপিআই(এম)ৰ কৰ্মী-সমৰ্থক সকলক আক্ৰমণৰ লক্ষ্য কৰি লৈছে দলটোৱে। পূৰ্ৱৰ নিৰ্বাচনতকৈ প্ৰায় ১০ শতাংশ ভোট কমি যোৱাৰ পাছতে অধিক হিংসাত্মক পৰিৱেশৰ সৃষ্টি কৰিছে বিজেপিয়ে। বিৰোধীক এই আক্ৰমণৰ সন্দৰ্ভত চিপিআই(এম)আৰু বাওঁ মৰ্চাৰ প্ৰতিনিধি দলে ৰাজ্যপালক সাক্ষাৎ কৰিবলৈ গৈছিল যদিও সাক্ষাৎ কৰিব নাপালে।
উল্লেখ্য যে ত্ৰিপুৰাত এই পৰ্যন্ত চি পি আই (এম) সমৰ্থকৰ ঘৰ-দুৱাৰ,সম্পত্তি ধ্বংস কৰা, শাৰীৰিক আক্ৰমণ, ধন দাবীৰ লগতে সাধাৰণ লোকৰ জীৱিকাৰ ওপৰত নিষেধাজ্ঞা আৰোপ কৰাৰ হিংসাত্মক আক্ৰমণ অব্যাহত আছে। দলটোৰ সৰ্বোচ্চ সমিতিৰ এক বিবৃত্তিৰ মতে বিৰোধী কৰ্মীৰ ওপৰত হাজাৰৰো অধিক কাণ্ডৰ সংঘটিত কৰিছে। এই হিংসাত বৰ্তমানলৈকে তিনিজন লোকৰ প্ৰাণ হেৰুৱাৰ উপৰিও বহু লোক আহত হৈছে। ঘটনা সংক্ৰান্তত ৬৬৮টা গোচৰো দাখিল কৰা হৈছে।
চি পি আই(এম)ৰ পলিট ব্যুৰোৱে আইন-শৃংখলা পুনৰুদ্ধাৰ কৰাৰ লগতে ভুক্তভোগীসকলক প্ৰয়োজনীয় আৰ্থিক আৰু চিকিৎসা সাহায্য প্ৰদানৰ বাবে ৰাজ্যৰ প্ৰশাসন শীঘ্ৰে হস্তক্ষেপ কৰিবলৈ আহ্বান জনাইছে। লগতে ত্ৰিপুৰাত বিজেপিয়ে গণতন্ত্ৰক হত্যা কৰাৰ বিৰুদ্ধে প্ৰতিবাদী কাৰ্যসূচী গ্ৰহণৰ আহ্বান জনাইছে।
