ভাৰতৰ জাতীয় কংগ্ৰেছৰ সভাপতি পদৰ বাবে ভোটদান প্ৰক্ৰিয়া ইতিমধ্যেই আৰম্ভ হৈছে। সুদীৰ্ঘ ২৫ বছৰৰ পাছত গান্ধী পৰিয়ালৰ বাহিৰৰ এজন প্ৰাৰ্থী দলটোৰ মুৰব্বী পদত অধিস্থিত হব। কংগ্ৰেছ দলটোৰ মূৰব্বী পদৰ বাবে প্ৰতিদ্বন্দিতা আগবঢ়াইছে দলটোৰ জ্যেষ্ঠ নেতা ক্ৰমে মল্লীকাৰজুন খৰ্গে আৰু শশী থাৰুৰে। Electoral Collage ৰ পৰা নিৰ্বাচিত প্ৰদেশ কংগ্ৰেছ কমিটিৰ ৯ হাজাৰৰো অধিক প্ৰতিনিধিয়ে এই নিৰ্বাচনত অংশ গ্ৰহণ কৰিব। গোপন বেলটৰ যোগেদি তেওঁলোকে দলৰ মুৰব্বী জনক নিৰ্বাচিত কৰিব। আজি পুৱা ১০ বজাৰ পৰা এআইচিচিৰ কাৰ্যালয় আৰু সমগ্ৰ দেশৰ ৰাজ্যিক কাৰ্যালয় সমূহৰ ভোটগ্ৰহণ কেন্দ্ৰত ভোটদান প্ৰক্ৰিয়া আৰম্ভ হয়। AICC ৰ মুখ্য কাৰ্যালয়ত ভোটদান প্ৰক্ৰিয়া আৰম্ভ কৰে প্ৰবীণ কংগ্ৰেছ নেতা পি চিদাম্বৰমে। আজি আবেলি ৪ বজাত ভোটগ্ৰহণ প্ৰক্ৰিয়াৰ অন্ত পৰিব আৰু অহা ১৯ অক্টোবৰ তাৰিখত নিৰ্বাচনৰ ফলাফল ঘোষণা কৰা হ’ব।গান্ধী পৰিয়ালৰ অতিশয় ঘনিষ্ঠ হোৱা হেতুকে মল্লীকাৰজুন খৰ্গেই নিৰ্বাচনৰ অন্তত বিজয়ৰ হাঁহি মাৰিব বুলি বহুতেই ধাৰণা কৰিছে। যদিও দুয়োগৰাকী প্ৰাৰ্থীয়ে সমগ্ৰ ভাৰততে তীব্ৰ প্ৰচাৰ চলাই আহিছে। উল্লেখ্য যে, কংগ্ৰেছ দলৰ প্ৰায় ১৩৭ বছৰীয়া ইতিহাসত ষষ্ঠবাৰৰ বাবে নিৰ্বাচনী প্ৰতিদ্বন্দিতাৰ জৰিয়তে দলটোৰ সভাপতি নিৰ্বাচিত কৰা হ’ব।
