চলিত বৰ্ষত বিশ্বৰ বহুকেইজন সামাজকৰ্মী,ৰাজনীতিবিদ,পৰিৱেশকৰ্মী লগতে দুজনকৈ ভাৰতীয় সাংবাদিক শান্তিৰ নোবেল বঁটাৰ বাবে মনোনীত হৈছে।
তথ্য পৰীক্ষা কৰা জনপ্ৰিয় ৱেবছাইট ‘alt news ‘ৰ সহ-প্ৰতিষ্ঠাপক প্ৰতীক সিনহা আৰু মহম্মদ জুবাইৰক নোবেল বঁটাৰ বাবে মনোনীত কৰিছে বঁটা প্ৰদান কমিটিয়ে।
চলিত মাহৰ ৭ অক্টোবৰত নৰৱেৰ নোবেল কমিটিয়ে শান্তিৰ নোবেল বঁটা বিজয়ীৰ নাম ঘোষণা কৰিব।
উল্লেখযোগ্য যে যিসকল লোকে মানৱ জাতিৰ উত্তৰণৰ হকে কাম কৰি আহিছে সেই সকলৰ মাজৰ পৰাই নিৰ্বাচিত কৰি শান্তিৰ নোবেল বঁটা প্ৰদান কৰা হয়।
ভাৰতৰ সাংবাদিক দুজন ক্ৰমে প্ৰতীক সিনহা আৰু মহম্মদ জুবাইৰে সামাজিক তথা সংবাদ মাধ্যমত ভুলকৈ প্ৰচাৰিত হৈ থকা খবৰ সমূহ alt news ৰ যোগেদি সঠিক ৰূপত উপস্থাপন কৰি আহিছে।
ভুল তথ্যৰ বিৰুদ্ধে দিয়া যুঁজ, সামাজিক তথা সংবাদ মাধ্যমত প্ৰচাৰিত ভুৱা বাতৰিৰ পদ্ধতিগতভাৱে উদঙাই দিয়া তথা তথ্য পৰীক্ষা কৰা ৱেবছাইট alt newsত কৰি অহা কাম-কাজৰ বাবে শান্তিৰ নোবেল বঁটাৰ বাবে মনোনীত হৈছে।
উল্লেখযোগ্য যে চলিত বৰ্ষৰ জুন মাহত দিল্লী আৰক্ষীয়ে এটা ৪ বছৰীয়া পুৰণি টুইটক ভিত্তি কৰি জুবাইৰক গ্ৰেপ্তাৰ কৰিছিল আৰু প্ৰায় এমাহৰ পিছত অৰ্থাৎ ২০ জুলাইত উচ্চতম ন্যায়ালয়ে জুবাইৰক জামিন প্ৰদান কৰিছিল।
ভাৰতৰ দুই সাংবাদিকৰ উপৰিও বেলাৰুছৰ বিৰোধী ৰাজনীতিবিদ স্ভিয়াটলানা ছিখানুস্কায়া, ব্ৰিটিছ প্ৰকৃতি সম্প্ৰচাৰক ডেভিদ এটেনব’ৰ’, বিশ্ব স্বাস্থ্য সংস্থা, পৰিৱেশ কৰ্মী গ্ৰেটা থানবাৰ্গ, প’প ফ্ৰান্সিছ, টুভালুৰ বৈদেশিক মন্ত্ৰী চাইমন ক’ফে, আৰু ম্যানমাৰৰ ৰাষ্ট্ৰীয় ঐক্য চৰকাৰক মনোনীত কৰা হৈছে।
